Олий Мажлис Конунчилик палатаси

Avia va temir yo‘l transportlarida fuqarolarga xizmat ko‘rsatish holati qanday?

18:11 08.02.2024
3247

Oliy Majlis Qonunchilik palatasining Sanoat, qurilish va savdo masalalari qo‘mitasi tomonidan Transport vazirligining “Avia va temir yo‘l transportlarida fuqarolarga xizmat ko‘rsatish sifatini oshirish borasida olib borilayotgan ishlar to‘g‘risida”gi axboroti eshitildi.

Mamlakatimizda avia va temir yo‘l transporti sohalarini isloh qilish, sog‘lom raqobat muhitini yaratish, tizimga xususiy sektorni keng jalb qilish, boshqaruvning zamonaviy usullarini joriy etish bo‘yicha keng ko‘lamli ishlar amalga oshirilmoqda. Davlatimiz rahbarining tegishli Farmon va qarorlari sohani yanada rivojlantirishda muhim ahamiyat kasb etmoqda. Sohaga oid munosabatlarni tartibga soluvchi huquqiy baza doimiy takomillashtirilib borilmoqda. Havo kodeksi, “Transport to‘g‘risida”gi qonun shular jumlasidandir.

Eshituvda ta’kidlanganidek, 2023-yilda mamlakatimizdagi 11 ta xalqaro aeroport va uchish-qo‘nish maydonchalari orqali 85 702 ta aviaqatnov amalga oshirilib, 10 mln. 409 ming yo‘lovchiga, 70,870 ming tonna yuk va pochtaga xizmat ko‘rsatilgan. Aviakompaniyalar soni 9 tadan 15 taga yetkazilgan. Shuningdek, milliy aviaparkimizga xorijdan 28 ta havo kemasi olib kelinib, ularning umumiy soni 75 taga yetgan. O‘zbekistonning aviatashuvlar bozorida faoliyat yuritayotgan xorijiy aviakompaniyalar soni 40 taga yetkazilgan. Parvozlar geografiyasini kengaytirish maqsadida rezident va xorijiy aviakompaniyalar tomonidan 20 ta yangi xalqaro yo‘nalishda qatnovlar yo‘lga qo‘yilgan.

Bundan tashqari, 2023-yilda temir yo‘l transportida mahalliy yo‘lovchilarni tashish yo‘nalishlari 6 taga oshirilib, 29 taga yetkazilgan. Mazkur yo‘nalishlarda 44 ta yo‘lovchi poyezd harakatlangan bo‘lib, shulardan 6 tasi yuqori tezlikda harakatlanuvchi, 6 tasi tezyurar, 16 tasi yo‘lovchi poyezdlari hamda 18 tasi shahar atrofida harakatlanuvchi elektropoyezdlardir.

Yuqori tezlikda harakatlanuvchi Afrosiyob elektropoyezdlari “Toshkent-Buxoro-Toshkent” yo‘nalishida har kuni 3 ta, “Toshkent-Qarshi-Toshkent” yo‘nalishida haftasiga 10 ta, “Toshkent-Samarqand-Toshkent” yo‘nalishida har kuni 1 ta, “Toshkent-Shahrisabz-Toshkent” yo‘nalishida haftasiga 1 ta elektropoyezdlar o‘z tashuvlarni amalga oshirmoqda. Ushbu elektropoyezdning yo‘lovchi sig‘imi 286 o‘rinli bo‘lib, kuniga o‘rtacha 2,9 mingtadan 3,5 mingtagacha yo‘lovchilarga xizmat ko‘rsatmoqda.

Eshituvda sohada amalga oshirilayotgan ishlar bilan birga, ayrim kamchiliklar mavjudligi qayd etildi. Xususan, raqamlashtirish bo‘yicha bir qancha ijobiy ishlar amalga oshirilganligiga qaramay avia va temiryo‘l transporti uchun chipta xarid qilish jarayonida inson omili hanuz yuqori ekanligi, korrupsion va tanish bilishchilik holatlarining borligi qayd etildi. Shu bilan birga, vagonda birlamchi tibbiy xizmat ko‘rsata oluvchi mutaxassislar yo‘qligi, shahar atrofi hududlarga harakatlanuvchi zamonaviy tezyurar elektrpoyezdlari qatnovi hanuzgacha yetarli darajada tashkil etilmaganligi tanqid qilindi.

Shuningdek, mamlakatga lizing asosida olib kelinayotgan havo kemalari uchun aniq mezonning belgilanmagani, charter va muntazam parvozlarni amalga oshirish hamda xorijiy aviatashuvchilarni O‘zbekiston aviatashuvlar bozoriga jalb etish bo‘yicha mezonlarning mukammal emasligi, fuqaro aviatsiyasi sohasini raqamlashtirish va o‘zaro integratsiyalashda mezonlarning belgilanmagani e’tirozlarga sabab bo‘ldi.

Muhokamalar davomida deputatlar mamlakatimizda avia va temir yo‘l transportlariga bo‘lgan talab kundan-kunga oshib borayotganini qayd etib, avia va temir yo‘l tizimida tashuvchilarning qonunchilikda majburiyatlari va javobgarligini aniq belgilash, sohaga xususiy sektor va xorijiy investitsiyalarni keng jalb etish bo‘yicha mutasaddilarga bir qator takliflarni berdilar.

Eshituvda kun tartibidagi masala yuzasidan qo‘mitaning tegishli qarori qabul qilindi.