Олий Мажлис Конунчилик палатаси

Долзарб қонун лойиҳалари муҳокама қилинди

18:02 01.05.2023
1535

2023 йил 1 май куни Олий Мажлис Қонунчилик палатасидаги “Адолат” СДП фракциясининг навбатдаги йиғилиши бўлиб ўтди. Унда фракция аъзолари томонидан “Педагог ходимнинг мақоми тўғрисида”ги қонун лойиҳаси муҳокама қилинди.

Таъкидланганидек, мамлакатимизда педагог касбининг аҳамияти ва нуфузини ошириш, уларнинг моддий турмуш шароитларини яхшилашга, шунингдек, ёш авлодни тарбиялаш сингари масъулиятли меҳнатини муносиб баҳолашга йўналтирилган чора-тадбирлар изчиллик билан амалга оширилмоқда. Жумладан, сўнгги йилларда педагог ходимларнинг иш ҳақи миқдорлари бир неча маротаба оширилди, уларга алоҳида устама ҳақлар жорий этилиши ва таълим стандартлари талабларига мувофиқ педагогларнинг иш юкламалари мақбуллаштирилди.

Бироқ, педагогларнинг мақомини ошириш бўйича бугунги кунга қадар амалга оширилган чора-тадбирлар ва қабул қилинган ҳужжатлар улар фаолиятини тўлақонли бажаришига, етарли даражада моддий, ижтимоий ва уларнинг касбий фаолиятига ноқонуний аралашувлардан ҳимоя қилишга, вазифа ва функцияларига тааллуқли бўлмаган бошқа ишларга жалб қилинмаслиги учун тўла асос бўлиб хизмат қилмаяпти.

Бундан ташқари, давлат таълим ташкилотлари раҳбарлари, таълим соҳасидаги ваколатли давлат бошқаруви органлари, назорат қилувчи ва ҳуқуқни муҳофаза қилувчи органлар ҳамда ота-оналарнинг педагог ходимларнинг касбий фаолиятларига асоссиз аралашувлари улар томонидан таълим сифатини яхшилаш, таълим ва тарбия олувчиларга етарли билим ва кўникмаларни бериш имкониятини бермаяти.

Шундан келиб чиқиб, педагог ходимнинг жамиятдаги мақомини юксалтириш, унинг фаолияти билан боғлиқ ҳуқуқий, ижтимоий ва иқтисодий муносабатларни тартибга солиш ва касбий камол топиши учун шароит яратиш ҳамда ҳуқуқий кафолатларини таъминлаш мақсадида “Педагог ходимнинг мақоми тўғрисида”ги Қонун лойиҳаси ишлаб чиқилди.

Ушбу қонун лойиҳаси таълим ташкилотлари педагог ходимларининг ҳуқуқлари, шаъни, қадр- қиммати ва ишчанлик обрўси давлат ҳимояси остида бўлишини кафолатлаш мақсадида, шаъни, қадр-қимматини ҳимоя қилиш масаласида ва мансабдор шахсларнинг хатти-ҳаракатлари устидан судга мурожаат қилганида давлат божини тўлашдан озод этиш таклиф этилмоқда.

Педагог ходимни лавозим мажбурияти ва касбий фаолияти билан боғлиқ бўлмаган ишларга, йиғилишлар ва бошқа тадбирларга жалб қилишни тақиқлаш, илк бор касбий фаолият бошлаётган шахсга бир ўқув йили даврига ўқитувчи-мураббийликни амалга оширувчи педагог ходимни бириктириш белгиланмоқда.

Шу билан бирга, педагог ходимнинг касбий фаолияти давомида юқумли касалликларга қарши бепул профилактик эмлаш давлат томонидан таъминланиши, эллик олти иш кунидан иборат йиллик ҳақ тўланадиган узайтирилган таътил бериш назарда тутилмоқда

Депутатлар ушбу қонунда ёшларга таълим ва тарбия бериш жараёнида ўқитувчилар ўзларининг салоҳиятини тўлиқ намоён этишлари учун зарур шарт-шароитлар яратиш, уларни ижтимоий, ҳуқуқий, моддий қўллаб-қувватлаш чоралари кафолатланиши лозимлигини таъкидлаб ўтдилар.

Муҳокамалар чоғида фракция аъзолари педагог ходимнинг шахсий ҳуқуқлари ҳамда касбий эркинликларини кафолатлаш янада кучайтирилаётганини эътироф этишди. Шунингдек, мазкур қонун лойиҳаси педагог ходимнинг қадр-қимматини, шаънини ҳимоя қилишга, ҳуқуқ ва эркинликларини ишончли ва мустаҳкам таъминлашга хизмат қилишини алоҳида таъкидлаб ўтишди.

Йиғилишда депутатлар мазкур қонун лойиҳаси юзасидан ўз фикр-мулоҳазаларини, таклифларини билдирди. Шунингдек, бир қатор аниқлаштирувчи саволлар берилди ва уларга атрофлича жавоблар олинди. Қизғин муҳокамалардан сўнг, қонун лойиҳаси қўллаб-қувватланди

Йиғилишда шунингдек, бир қатор қонун лойиҳалари партия мақсад ва вазифаларидан келиб чиқиб қизғин муҳокама қилиниб, депутатлар томонидан маъқулланди.