Cайт ранги: A A


Халқаро фаолияти

Ўзбекистон парламент делегацияси Тожикистонда

Ўзбекистон Республикаси Олий Мажлиси Қонунчилик палатаси Спикери Нурдинжон Исмоилов бошчилигидаги парламент делегацияси Тожикистон Республикасида меҳмон бўлиб турибди. Ташрифнинг биринчи куни делегациямиз аъзолари Душанбе шаҳрида Тожикистон парламенти қуйи палатаси Спикери Шукуржон Зуҳуров билан учрашди.

Шукуржон Зуҳуров ҳамкасбини қутлаш асносида мазкур ташрифнинг аҳамияти юқори эканини, бу ўзбек–тожик парламентлараро муносабатларида янги саҳифа очишига, шунингдек, икки мамлакат парламентлари ўртасидаги алоқаларни мустаҳкамлашга салмоқли ҳисса қўшишини алоҳида таъкидлаб ўтди. Шу билан бирга, Тожикистон ва Ўзбекистон парламентлари ўртасидаги алоқалар келгусида икки томонлама муносабатларнинг асосини ташкил этувчи иқтисодий, гуманитар ва маданий соҳалардаги ҳамкорликни кучайтиришда муҳим роль ўйнашига умид билдирди.

Таъкидлаш жоизки, шу йилнинг ўзида мамлакатларимиз ўртасида умумий қиймати 730 миллион АҚШ долларидан зиёд бўлган 180 дан ортиқ келишув ва шартномалар имзоланди.

“Биз Тожикистонда эртами ё кеч — доим кўп асрлик муносабатларимизда яхши замонлар келишига ва барчаси ўз ўрнига қайтишига ишонар эдик. Ҳурматли Шавкат Мирзиёев Президент бўлиб сайланганидан сўнг мустаҳкам ишонч ила қўшнилар билан муносабатларни йўлга қўйишини маълум қилган эди ва у киши ўз сўзининг устидан чиқди”, дейди Шукуржон Зуҳуров.

Ўз навбатида, Ўзбекистон Республикаси Олий Мажлиси Қонунчилик палатаси Спикери Нурдинжон Исмоилов мамлакатларимиз парламентлари вакиллари барча соҳаларда Ўзбекистон ва Тожикистон муносабатларини ривожлантиришда ўзининг муносиб ҳиссасини қўшиши лозимлигини таъкидлаб ўтди. Хусусан, давлатларимиз раҳбарларининг расмий ташрифлари чоғида имзоланган, икки мамлакатнинг манфаатларига бирдек хизмат қиладиган келишувларнинг ижросини таъминлашда парламентларимизнинг салоҳиятидан фойдаланиш мақсадга мувофиқ эканини қайд этди.

Самимий ва конструктив руҳда ўтган мулоқотда ҳамкорликнинг бошқа йўналишлари юзасидан ҳам фикр алмашилди.


Кўришлар сони: 1602


Депутатлар минбари

Янгиликлар

14.10.2019
Парламентлараро иттифоқнинг 141-Ассамблеясида Ўзбекистон делегацияси иштирок этяпти

Унда парламент аъзолари томонидан гендер тенгликни яхшилаш, ёшларнинг ҳуқуқларини ҳимоя қилиш, депутатларнинг...

14.10.2019
Давлат бюджети парламент томонидан қонун асосида қабул қилинади

Айни кунларда парламент қуйи палатасида бир қатор қонун лойиҳалари маромига етказилмоқда. Хусусан,...

14.10.2019
Қонун лойиҳаларини ишлаб чиқишда давлат тили қоидаларига амал қилинадими?

Жамиятдаги муносабатларни ҳуқуқий жиҳатдан тартибга соладиган омил бу қонунлардир. Шундай экан, ...

Тадбирлар тақвими