Cайт ранги: A A


Фракция йиғилишлари

Зиёрат туризми жадал ривожланади

Зиёрат туризми жадал ривожланади

Қадимий обидалар, муқаддас зиёратгоҳлар, тарихий ва маданий ёдгорликлар билан бир қаторда, бетакрор маданияти ва анъаналари, хушманзара табиати ҳамда файзли гўшалари билан сайёҳларни ўзига ром этиб келаётган мамлакатимизда ушбу йўналишда амалга оширилаётган саъй-ҳаракатлар туризм индустрияси ҳамда инфратузилмасини янада ривожлантиришда муҳим аҳамият касб этмоқда.

Буни Жаҳон саёҳат ва туризм кенгаши (WTTC) томонидан “Саёҳат ва сайёҳлик саноатининг иқтисодий натижалари” бўйича ўтказилган тадқиқотларда республикамиз сайёҳлик соҳаси жадал тараққий топаётган беш давлатнинг бири сифатида қайд этилгани мисолида яққол кўришимиз мумкин.

Дарҳақиқат, туризм нафақат иқтисодий ривожланиш ҳамда ялпи ички маҳсулот ҳажмининг ортиши, балки аҳоли бандлигини таъминлаш, турмуш даражаси ва сифатини ошириш, юрт фаровонлиги ва тараққиёти юксалишига ҳам катта таъсир кўрсатади. Мутахассисларнинг ҳисоб-китобларига кўра, ҳар 30 нафар сайёҳ мамлакат туризми соҳасида битта, унга турдош тизимларда эса иккита янги иш ўрнини яратишга туртки беради.

Ҳар йили юртимизга дунёнинг 70 давлатидан икки миллионга яқин сайёҳ ташриф буюради. Улар учун маданий-тарихий туризм энг оммабоп бўлиб қолмоқда. Бундан ташқари, мавжуд 500 дан ортиқ туристик компанияларнинг 110 дан зиёди халқаро йўналишларда изчил фаолият олиб бо­раётгани сайёҳларни юртимизга кенг жалб этишда муҳим омил бўлаётир.

Шу ўринда таъкидлаш керакки, мамлакатимизда ўтган давр мобайнида соҳани тартибга солиш ҳамда унинг ҳуқуқий асосларини мустаҳкамлаш учун зарур норматив-ҳуқуқий база яратилди. Хусусан, Президентимизнинг ўтган йил декабрдаги “Ўзбекистон Республикасининг туризм соҳасини жадал ривожлантиришни таъминлаш чора-тадбирлари тўғрисида”ги Фармони ҳамда “Ўзбекистон Республикаси Туризмни ривожлантириш давлат қўмитаси ­фаолиятини ташкил этиш тўғрисида”ги қарори соҳада туб бурилиш ясалишига, тараққиётда янги саҳифалар очилишига хизмат қилмоқда. Давлатимиз раҳбарининг жорий йил 16 августдаги “2018-2019 йилларда туризм соҳасини ривожлантириш бўйича биринчи навбатдаги чора-тадбирлар тўғрисида”ги қарори ушбу йўналишдаги ислоҳотларни янада кенгайтиришда муҳим аҳамиятга эга ҳужжат бўлди.

Бинобарин, қарор билан тизимда меъёрий-ҳуқуқий тартибга солишни такомиллаштириш ва халқаро ҳамкорликни ривожлантириш, Ўзбекистонга саёҳатларни арзонлаштириш, юртимизнинг барча ҳудудида туризмни ва соҳа билан боғлиқ инфратузилмани ривожлантириш, туристик маҳсулотларни диверсификация қилиш ва янги туризм объектлари ташкил этиш, шунингдек, миллий туризм маҳсулотларини ички ва ташқи бозорларда фаол ва комплекс илгари суришга қаратилган 2018-2019 йилларда туризмни ривожлантириш бўйича биринчи навбатдаги чора-тадбирлар дастури тасдиқланди. 

Мазкур дастурга асосан, мамлакатимизнинг ўзига хос жиҳатларидан келиб чиқиб, замонавий дам олиш ҳудудлари, тўрт юлдузли меҳмонхона ва меҳмонхона мажмуалари, хорижий туристлар учун дам олиш масканлари, қолаверса, Бухоро ва Самарқанд шаҳарларидаги туризм ҳудудлари тажрибаси асосида Урганч, Тошкент шаҳарлари ва Фарғона вилоятида туризм ҳудудлари, Тошкент вилоятининг Бўстонлиқ туманида тоғ клас­терларини босқичма-босқич ташкил этиш кўзда тутилди. Албатта, бу мамлакатимиз сайёҳлик салоҳиятини янада юқори босқичга кўтаришда муҳим ўринга эга.

Қарор билан тасдиқланган чора-тадбирларнинг амалга оширилишини мунтазам ўрганиш тизимининг жорий этилиши, Вазирлар Маҳкамаси ҳузурида Мувофиқлаштирувчи Кенгаш ҳамда ҳудудий кенгашларнинг ташкил қилиниши дастурдаги ҳар бир вазифанинг ижроси белгиланган муддатда сифатли ва тўлиқ бажарилишини таъминлайди.

Ушбу ҳужжатга мувофиқ, хорижлик туристлар учун виза тартиботини соддалаштириш ва зиёрат туризмини ташкил этиш бўйича таклифларни мунтазам киритиб бориш ҳамда мазкур вазифани амалга ошириш бўйича доимий фаолият юритадиган ишчи гуруҳи тузилмоқда. Бу, айтиш мумкинки, юртимизга ташриф буюраётган сайёҳларга янада қулайлик туғдиради.

Ўз навбатида, давлатимиз раҳбарининг мазкур қарори “Миллий тикланиш” демократик партиясининг парламент қуйи палатасидаги фракцияси ҳамда партия фаоллари зиммасига ҳам катта масъулият юклайди. Жумладан, партиянинг сайловолди платформасида сайёҳлик инфратузилмасини янада ривожлантириш, транспорт ва меҳмонхона хизматлари ва сайёҳлик ­логистикаси билан боғлиқ хизматларнинг қулайлигини ошириш, шунингдек, туристик фаолият билан шуғулланадиган субъектларга шарт-шароитлар яратиш,  хорижий туристлар учун виза тартибини соддалаштириш каби муҳим вазифалар акс этган. Очиғи, ушбу йўналишда ҳали кўп ишлар қилишимиз керак. Бу борада фракциямиз ҳамда партиямиз фаолларидан ташаббускорлик, қатъият ва шижоат талаб этилади.

Қарорда белгиланган чора-тадбирларни ҳаётга самарали татбиқ этиш иқтисодиётимизни янада ривожлантириш, мамлакатимизнинг бой тарихи, маданияти, меъморий ёдгорликлари ҳамда ноёб анъаналарини бутун жаҳонга танитишга ҳамда Ўзбекистон дунё давлатлари сайёҳлари учун энг севимли туристик йўналишлардан бирига айланишига хизмат қилади.

Иноят ХАЖИЕВ,

Ўзбекистон Республикаси Олий Мажлиси

Қонунчилик палатаси депутати,

«Миллий тикланиш» демократик

партияси фракцияси аъзоси


Кўришлар сони: 1033

Депутатлар минбари

Янгиликлар

18.09.2017
Ижтимоий соҳага оид қарорлар ижроси парламент назоратида бўлади

2017 йил 18 сентябрь куни Олий Мажлис Қонунчилик палатасидаги Ўзбекистон Халқ демократик партияси...

15.09.2017
Феруза ИБРАГИМОВА: Юксак маънавият, интелектуал салоҳият – мамлакат келажаги

Кутубхоналар – халқимизнинг маънавий-маданий мероси ҳамда интелектуал салоҳиятини намоён этади. Ку...

14.09.2017
Ёшлар билан очиқ мулоқот

Жорий йилнинг 14 сентябрь куни Олий Мажлис Қонунчилик палатасида Ўзбекистон Республикасининг “Ёшларга...

Тадбирлар тақвими