Cайт ранги: A A


Палата мажлислари

Парламент Қонунчилик палатасида янги амалиёт жорий қилинди

Парламент Қонунчилик палатасида янги амалиёт жорий қилинди

Олий Мажлис Қонунчилик палатаси фаолиятида янги амалиёт қарор топди: 2020 йил 11 март куни ўтказилган навбатдаги ялпи мажлисда парламент тарихида илк бор депутатларнинг 2020 йил 27-29 февраль кунлари ўз сайлов округларида ўтказилган учрашувлари якунлари тўғрисидаги масала кўриб чиқилди.

Илк, дейилишига сабаб бор, албатта. Илгарилари сайлов округларидаги фаолият фракцияларнинг ўзидагина муҳокама қилинган, холос. Бу сафар ушбу масала ялпи мажлис даражасига олиб чиқилди.

Боиси, янги шароитларда фаолият юритаётган янги парламент давлатимиз раҳбарининг Олий Мажлисга йўллаган Мурожаатномасида белгилаб берилган устувор вазифаларга мос равишда иш олиб боряпти. Яъни, Президентимиз таъкидлаганидек, ҳар бир депутат ўз ҳудудида яшаётган аҳоли муаммоларини ечишда фаол иштирок этиб, одамларнинг дарду ташвишларини тинглаш асносида сайловчиларига берган ваъдалари устидан чиқишга, халқнинг ишончини оқлаб, меҳрини қозонишга ҳаракат қилмоқда.

Бунининг тасдиғи сифатида шу йил февраль ойи охирида Олий Мажлис Қонунчилик палатаси депутатлари ўзи сайланган округларда бўлиб, аҳоли билан учрашувлар ўтказиб, одамларни қийнаётган масалаларни ўрганган эди. Аҳоли билан юзма-юз мулоқотлар жараёнида халқимизни ўйлантираётган муаммоларни ўз вақтида бартараф этиш кун тартибидаги асосий масалалардан бири бўлди.

Мажлисда ана шу таҳлилий-танқидий ўрганишлар якунлари бўйича тайёрланган ахборотни Олий Мажлис Қонунчилик палатаси Спикери Н.Исмоилов ўқиб эшиттирди.

Ахборотда қайд этилганидек, ўрганишлар жараёнида парламент аъзолари томонидан қатор учрашувлар ташкил этилиб, фуқаролар қабули ўтказилди. Хонадонлар ва ижтимоий соҳа объектларида бўлган депутатлар ёшлар, тадбиркорлик субъектлари вакиллари билан суҳбатлашди. Хусусан, халқ ноиблари 649 та хонадонда бўлди, 741 та учрашув ўтказди. Уларда 34 мингдан зиёд фуқаро, шу жумладан, 3,5 мингдан зиёд тадбиркор билан бевосита учрашув ва мулоқотлар ташкил этилди. 356 та ижтимоий соҳа объекти фаолияти билан танишилди.

Таъкидлаш жоиз, учрашувларда аниқланган муаммоларнинг айримлари жойида ўз ечимини топди. Туман ва шаҳар даражасидаги 920 та, вилоят даражасидаги 416 та масала депутатлар томонидан маҳаллий ижро ҳокимияти билан биргаликда ҳал этиш чоралари кўрилмоқда.

Қайд этилганидек, қуйи палатадаги сиёсий партиялар фракциялари томонидан республика даражасидаги тизимли 309 та масалани парламент назоратининг парламент сўрови, парламент эшитуви, қўмита эшитуви, депутат сўрови каби шаклларидан фойдаланган ҳолда бартараф этиш юзасидан зарур чора-тадбирлар белгилаб олинди. Масалан, ЎзЛиДеП партияси фракцияси аъзолари жойларда учраётган долзарб тизимли муаммолардан бири — ер-жой ажратиш, кадастр хизмати билан боғлиқ масалани тезкор равишда парламент даражасида кўтариб чиқди. Яъни, 2020 йил 10 март куни Олий Мажлис Қонунчилик палатасида ўтказилган навбатдаги “Ҳукумат соати”да Ер ресурслари, геодезия, картография ва давлат кадастри давлат қўмитаси мутасаддиларини “Ер майдонларини танлаш ва тадбиркорлик субъектларига ер участкаларини ажратиш, ер участкаларига бўлган ҳуқуқларни давлат рўйхатидан ўтказиш юзасидан амалга оширилаётган ишлар, шунингдек, қишлоқ хўжалигида фойдаланиладиган ер фондининг самарали ишлатилиши бўйича олиб борилаётган чора-тадбирлар тўғрисида”ги масала юзасидан эшитиб, муҳокама қилишга эришди.

Депутатларнинг сайлов округларидаги учрашувлари самарадорлигини янада ошириш мақсадида Қонунчилик палатасидаги бошқа партиялар фракциялари ҳам ўз мажлисларида сайлов округларидаги учрашувлар натижаларини мунтазам муҳокама қилиб, аниқланган муаммо ҳамда камчиликларни бартараф этиш чора-тадбирларини тизимли равишда амалга оширишга киришмоқда.

Мажлисда депутатларнинг сайлов округларидаги навбатдаги учрашувларини ҳам янгича шакл ва ёндашувлар асосида ташкил этиш юзасидан фикр-мулоҳаза ва таклифлар тингланди.

Парламент қуйи палатасида қарор топган ушбу янги амалиётни келгусида ҳам мунтазам равишда давом эттиришга келишиб олинди.


Кўришлар сони: 481

Депутатлар минбари

Янгиликлар

08.04.2020
Депутатлар ўз сайловчиларига мурожаат билан чиқди

Инсоният тараққиётнинг ҳозирги кунига қадар жаҳоншумул ютуқларга эришди. Уларни бирма-бир санаш муш...

07.04.2020
Депутатлар жарималар оширилишига қарши овоз берди

Гап шундаки, мамлакатимизда кейинги пайтларда автотранспорт воситалари сонининг кескин ортиши йўлларда...

07.04.2020
Экотуризмни ривожлантириш — муҳим вазифа

Парламент қуйи палатасининг навбатдаги ялпи мажлисида депутатлар томонидан “Ўзбекистон Республикасининг...